Spïelelæstoe

Mov nomme Vanja Tørresdal jïh leam 20 jaepien båeries. Manne aktede onne voeneste båatam man nomme Praahke Trööndelagesne, sveerjen raasten lïhke. Desnie maana- jïh noereskuvlem veedtsim, men mov minngemes jaepien noereskuvlesne, jïh jåarhkeskuvlesne studijespesialiseradimmesne lim Rørosesne. Mænngan realfaagh lohkeme golme jaepieh lastoem åadtjoejim maam akt jeatjah darjodh, jeatjah nuepieh goerehtidh.

Manne båatsoefuelhkesne byjjenamme gusnie lïhke eatnamasse jielebe jïh eatnamistie jielebe. Dan gaavhtan iktesth vihkeles munnjien orreme mijjen kultuvren  bïjre mubpide soptsestidh. Dan åvteste lastoem åadtjoejim syökedh saemien tsïegline sjïdtedh, dellie mov lea nuepie jïjtje vielie lïeredh dan saemien kultuvren bïjre, men aaj mubpide lïerehtidh.

Astoeaejkien lyjhkem ålkone årrodh eatnamisnie, duedtine gïehtelidh, jïh aaj musihkine gïehtelidh, manne dovne laavloem jïh pianovem tjoejehtem.

Mov lea jienebh veanhtadimmieh daan jaapan goh tsïegle. Gaskem jeatjah aavodem lïeredh, jïh saemien kultuvren bïjre mubpide soptsestidh. Lissine aavodem fealadidh, jïh Nöörjen gellie sijjieh dååjredh. Aaj aavodem orre almetjigujmie åahpenidh.

Njieljie varke gyhtjelassh:

1. Maam 10 jaepine darjoeh?

Manne mån ööhpehtimmiem jïh aktem barkoem åådtjeme mïsse stoerre ïedtjem åtnam, jïh dagke aalkeme fuelhkiem tseegkedh. Manne gujht aaj jïjnjem dorjeme maam im gåessie gænnah lim veanhteme manne sijhtim darjodh. Gegkestem manne leam åådtjeme bïjre jarkan veartenisnie mïnnedh.

2. Maam darjoeh jis naaken datnine flöörtede aktene håaloemisnie datne höölth?

Aajmoe tjiehtjielisnie dam muana. Jis numhtie sååjhtoe dellie dagke bååstede flöörtedem.

3. Mah tv-raajroeh sïjhth hotellesne vuartasjidh gosse dov lea astoeaejkie skuvlevaaksjomi gaskem?

Once Upon a Time, Orange is the new black, jïh dagke aalkam vuartasjidh Game Of Thrones.

4. Maam saemien åahpetjidie datne buaresjh?

Im naan sjïere buaresjh, men tuhtjem jienebh væjkeles artisth gååvnesieh, gaskem jeatjah Sofia Jannok, Felgen orkester jïh ISÁk.