Manne Ole-Christer Hætta, leam 19 jaepien båeries jïh Guovdageaidnuste. Manne Guovdageaidnusne årroejim goske lim 3 jaepien båeries, dellie Altese juhtim mov fuelhkine ektine. Desnie veedtsim saemien maanagiertesne, jïh saemien klaassesne veedtsim njealjeden klaassen raajan. Mænngan Altesne orreme 7 jaepieh bååstede Guovdageaidnuse juhtimh. Manne leam saemiestamme mov eejhtegigujmie jïh åerpenigujmie gåetesne, guktie lij hijven bååstede båetedh saemien seabradahkese. Manne maadthskuvlem illim jïh eelkim Saemien jåarhkeskuvlesne jïh båatsoeskuvlesne. Desnie studijespesialiseeremem realfaagine veedtsim, jïh e-sportem gïengelåbpoe goerehtim.
Fåantoe man åvteste realfaagem veeltim lea manne sïjhtem mov ellen stööremes nïekedassem jaksedh, mij lea pilovtine sjïdtedh. Manne iktesth girtieh jïh elmiefealadimmiem eahtseme. Manne mov eejhtegijstie jïh aarebi maanagïertebarkijijstie govleme, mov lij lastoe pilovtine sjïdtedh mænngan manne eelkim soptsestidh. Mov girtieïedtjen gaavhtan manne aaj bïjre jarkan veartenisnie mïnneme. Leam gelline kontineentine orreme maana- jïh noerebaelien, jïh mov sjaavnjoe lea gaajhkine kontineentine mïnnedh.
Mov aaj stoerre ïedtje musihkeste, joekoen «live»-musihke. Veartenen væjkalommes artisth vuejnedh gïeh sijjen ellen åehpemes laavlomh laavloeh rïekte dov tjelmiej uvte, lea akte domtese maam im maehtieh namhtah veasodh. Manne dan aavrehke orreme jïh vuajneme dovne Ariana Grandem jïh Dua Lipam gellien aejkien. Dah mov göökte lyjhkedeartisth, jïh dah gujht daejrieh guktie scenesne årrodh. Musihkeïedtjen gaavhtan manne aaj gelline festivaaline mïnneme bïjre jarkan Nöörjesne, jïh dam eahtsam.
Såemies varke saetniesvoeth
Mïsse jeenjemes aavodh daan tsïeglejaepien?
Bïjre jarkan Nöörjesne fealadih, orre almetjh råakedh jïh saemien kultuvren bïjre bievnedh.
Maam tuhtjh vihkielommes noerh Nöörjesne byöroeh saemien bïjre daejredh?
Mijjieh ibie låavthgåetesne årroeh, eah gaajhkh saemieh eevre seammalaakan, men mijjen lea gellie seamma hedtieh, jïh gaajhkh saemieh eah bovtsh utnieh.
Bööremes raerie jïengem tsööpkedh?
Geehth olles gååre sjeavohtsvoete sjïdth, aelkieh soptsestidh.
Maam 10 jaepine darjoeh?
10 jaepine leam pilovte SAS:sne jallh Widerøesne.
Maam lih sïjhteme meatan vaeltedh aevries såålese, jïh mannasinie?
Helikoptere, guktie maahtam såålem laehpedh gosse sïjhtem.
Gie dov saemien åvteguvvie jïh mannasinie?
Dellie tjoerem krist’åabpam Ella Marie Hætta Isaksen jiehtedh. Dïhte stoerre åvteguvvie jeenjesidie jïh munnjien. Dïhte duasta jiehtedh maam meala jïh ij bïllh sov mïelh buektedh. Dan åvteste dam gutnem.