Mov nomme Nathaniel Holan Larsen, manne 20 jaepien båeries maarkasaemie Áravuopmiste Áhkánjárgan tjïeltesne. Manne saemien fuelhkeste båatam, jïh nöörjen hïejmegïeline åtnam daaroedehtemen gaavhtan. Dan gaavhtan leam noerhtesaemien lohkeme UiT:sne jïh gïelem bååstede vaalteme. Manne dovne nööremes tjïelteståvrosne jïh åerpeni gaskem. Mov lea ektiedimmie Trööndelagese dan åvteste aehtjebe lea debpede.

Jeenjesh mannem demtieh goh akte guhte ïedtjem åtna politihkeste. Men jis lea mij akt maam eahtsam dellie dïhte escape room. Manne jïh mov voelph buektiehtimh ikth Romsan geervemes tjiehtjelem loetedh, bielelen raerieh jïh tjoevkesem, dan åvteste åajaldimh tjoevkesem båaltajehtedh. Dïhte lea dïhte stööremes mij mov jieliedisnie heannadamme mænngan tsïegline veeljesovveme. Manne aaj dïhte almetje mij eahtsa tragi-lustes gærjah lohkedh jïh PS4:sne spealadidh.

Åadtjodh tsïegline årrodh lea joekoen stoerre earoe. Manne tjarke aavodem bïjre jarkan laantesne fealadidh, jeatjah noerh gaavnedidh mah sijhtieh dan saemien bïjre lïeredh. Joekoen aavodem vielie lïeredh mov saemien maadtoen jïh histovrijen bïjre. Vïenhtem daate akte joekoen gieltege jaepie sjædta.

Mïsse jeenjemes aavodh daejnie tsïeglejaepine?
Manne jeenjemes aavodem SAS Eurobonus Gullie-kåarhtem åadtjodh. Ijje maa, manne aavodem jeatjah noerh gaavnedidh mah aavoedieh vielie dan saemien bïjre lïeredh, jïh dej gyhtjelassh vaestiedidh.

Maam tuhtjh vihkielommes noerh Nöörjesne byöroeh saemiej bïjre daejredh.
Saemieh leah eevre iemie almetjh, men joekoen gellielaaketje. Mijjieh aalkoeåålmege maam dagke naakenh dååjroeh goh mystiske, men rïektesisnie libie eevre sïejhme almetjh, mah staarine jïh voenine årroeh jïh iphonem utnieh.

Bööremes raerie jïengem tsööpkedh?
Jïengetsööpkijem åestedh. Hehe. Men edtjem itjmies årrodh dellie lea hei jiehtedh, jïh gellie gyhtjelassh gihtjedh almetjen bïjre. Almetjh iehtsieh jïjtsh bïjre soptsestidh, dellie hijven dam nuhtedh.

Maam 10 jaepine darjoeh?
Luhkie jaepine leam sån minngemosth sivijleeknovmine sjïdteme jïh mov lea hijven barkoe Narvikesne. Gåetie aktine gaahtojne, jïh ektieårroje.

Maam lih sïjhteme meatan vaeltedh akten aevries såålese, jïh man åvteste?
Manne lim sïjhteme meatan vaeltedh njaelkies seangkoem. Saaht guktie dle sïjhtem desnie joekoen guhkiem årrodh, man åvteste ij njaelkieslaakan åeredh mearan beerkemem vuertieminie.

Gie dov saemien åvteguvvie jïh man åvteste?
Mov saemien åvteguvvie lea tjidtjie. Dïhte mannem jïjnjem skreejrehtamme, jïh jïjnje mov stoerre ïedtjeste rïektesvoeten jïh hedtien åvteste leam tjidtjiebistie åådtjeme