Mov nomme Ida Emelie Marakatt Lindseth jïh manne19 jaepien båeries. Manne Lillestrømesne byjjenamme, lïhke Oslon ålkolen. Manne daanhtsojne gïehtelamme mænngan lim joekoen onne, jïh dïhte iktesth mov stoerre ïedtje orreme. Manne daejnie gïehtelamme jïh gaahtjeme suerkiej sisnjeli Freestyle jïh Disco Dans elitedaltesisnie Nöörjesne jïh ålkoelaantesne, jïh manne eadtjohke aarkebiejjiem lyjhkem.
Gåabpegh mov eejhtegh saemien dajvijste båetieh, tjidtjebe Gárasavvonistie (Karesuando) jïh aehtjebe Karasjohkeste, men jïjtje leam staarebyjresisnie byjjenamme. Byjjenimmien im leah saemiestamme, men veeljim saemien gïeleööhpehtimmine nedtesne aelkedh gosse jåarhkeskuvlem eelkim. Daanhtsoen baalte leam eadtjohke meatan noereorganisasjovnesne Noereh, mij munnjien akte såarhts tjaangemeokse don saemien seabradahkese jïh vearman stoerrestaaresne.
Gosse leam veeljesovveme goh akte dejstie daan jaapetje tsïeglijste, dellie dïhte joekoen luste. Manne tjarke aavodem jïjtje lïeredh jïjnjene kultuvren bïjre, jïh ij goh unnemes bïjre jarkan laantesne fealadidh jïh daam daajroem jeatjabidie geerjehtidh goh tjirkijh dan saemien åvteste. Manne gegkestem jienebi dajvigujmie åahpenidh dovne Saepmesne jïh jeatjah bieline Nöörjesne, jïh aavodem orre almetjh råakedh. Vïenhtem manne sïjhtem jïjnjem lïeredh daehtie jaepeste gusnie dovne haestemh, men aaj åajvoeh dååjresh jïh dååjrehtimmieh.
Såemies sneehpes saetniesvoeth
Mïsse jeenjemes aavodh daejnie tsïeglejaepine?
Manne aavodem ovmessie dajvine jïh skuvline mïnnedh laantesne. Ïedtjije sjædta govledh mïsse learohkh jïh jeatjebh onterdieh, jïh mejtie dagke haestije gyhtjelassh åadtjobe vaestiedidh.
Maam tuhtjh vihkielommes noerh Nöörjesne byöroeh saemiej bïjre daejredh?
Tuhtjem dïhte vihkielommes maam noerh byöroeh saemiej bïjre daejredh lea mijjieh ibie veasoeh naemhtie guktie mijjen maadteraahkah jïh maadteraajjah veasoejin 100 jaepiej juassah. Ibie låavthgåetesne årroeh jïh eah gaajhkesh bovtsh utnieh.
Bööremes raerie jïengem tsööpkedh?
Saepmesne; goerehth mejtie dijjieh lidie slïektesne. Jeatjah lehkesne; gïehtjedh mejtie dijjieh naan ektie voelph Facebookesne jïh Instagramesne utnede.
Maam 10 jaepine darjoeh?
10 jaepine gegkestem manne eantan vielie veartenistie dååjreme, jïh dagke gaskenasjonaale orgaanesne barkeminie jienebi kultuvrigujmie. Lij joekoen gieltege orreme vuesiehtimmien gaavhtan ålkoerïjhkedïenesjen åvteste barkedh diplomatijine, jallh aalkoeåålmegereereminie jïh reaktajgujmie.
Maam lih sïjhteme meatan vaeltedh akten aevries såålese jïh man åvteste?
Hijven peanna jïh jassijs tjaelemegærja! Dellie maahtam gærjam tjaeledh maam dagke naan jeatjebh sijhtieh gaavnedh jïh lohkedh mænngan.
Gie dov saemien åvteguvvie jïh man åvteste?
Mov saemien åvteguvvie lea Agnete Saba. Dïhte dan joekoen væjkele laavloje, jïh annje daan biejjien lyjhkem «Oro jaska beana», men dïhte åvteguvvine munnjien sjïdteme dan åvteste lea ræhpas sov psykiske haestemi bïjre karrijeeresne. Tuhtjem aaj dïhte lij joekoen mavvas gosse sov saemien minngienommem Saba veelti.