Mov nomme Ane Malene Nordeng, manne 23 jaepien båeries jïh leam dovne Ivgobahteste (Skibotn) jïh Gáivuotneste (Kåfjord). Aehtjie lea Olmmáivaggeste (Manndalen), tjidtj-aahka Birtavarreste bööti, guktie stööremes ektiedimmiem Gáivuotnese åtnam, dam gujht jïjtje vïenhtem. Mov tjidtj-aahka mov aehtj-aajjam Ivgobahtesne gaavnedi, jïh dah pruvrigan jïh årroejigan gaertienisnie gubpede mov tjidtj-aajja bööti, jïh dan åvteste dïhte mov hïejmesijjie sjïdti. Mov tjidtj-aahka jïh aehtj-aajja saemien ietniengieline utnin, jïh mearoesaemien byjresisnie byjjenin. Manne lim mov tjidtj-aahkan lïhke, jïh leam jïjnjem daajroem jïh tjiehpiesvoeth mijjen kultuvren bïjre destie åådtjeme.
Manne aktem jaepiem vaadtseme musihke-journalistihken sisnjelen Englaantesne, naakede maam tuhtjim lij joekoen gieltege. Don jaepien mænngan veeljim gåatan juhtedh, sïjhtim noerhtesaemien lïeredh jïh vielie jïjtjene kultuvresne goerehtidh. Daan gïjren (2021) mov bachelorgraadem åadtjoejim sosiologijesne, gusnie saemien teemaj bïjre tjeelim, jïh daate laavenjasse lij naakede dehtie bööremes maam dorjeme abpe mov lohkemem. Jåarhkeskuvlesne jurjiehtæjja- jïh servitöörefaagesne veedtsim, jïh leam ånnetji dejnie barkeme mov hïejmetjïeltesne.
Manne abpe jieledem fealadamme, gellide joekehts laantide ræjhkoes kultuvrigujmie jïh dïhte lea naakede destie maam bööremes lyjhkem, kultuvri bïjre lïeredh. Dan åvteste manne dajveste båatam gusnie stoerre daaroedehteme orreme, tuhtjem gaajh vihkele almetjh abpe laantesne nuepiem åadtjoeh saemiej jïh saemien kultuvren bïjre lïeredh naakenijstie guhth daajroem utnieh dam lïerehtidh. Manne tjarke aavodem daan jaapan goh saemien tsïegle juktie maehtedh jïjnjem orre dååjredh jïh lïeredh, jïh stoerre earoem damtem daejnie tihtelinie.
Såemies sneehpes saetniesvoeth
Mïsse jeenjemes aavodh daejnie tsïeglejaepine?
Manne raaktan gaajhkese aavodem, abpe jaapan! Men, tjoerem gujht jiehtedh manne leam joekoen jïjnjem aavoedamme Guovdageaidnusne årrodh jïh voenem sisnjelistie dååjredh.
Maam tuhtjh vihkielommes noerh Nöörjesne byöroeh saemiej bïjre lïeredh?
Sïjhtem noerh edtjieh daejredh jalhts mijjieh libie saemieh jïh mijjen leah jeatjah kultuvre jïh jieledevuekie, dellie rïektesisnie joekoen seammaplieres goh jienebelåhkoen årrojh. Mijjieh seamma skuvlh vaedtsebe, seamma vaarjoejgujmie vaedtsebe, seamma gåetine årrobe jïh libie noerh seammalaakan goh gaajhkh jeatjebh, raaktan.
Bööremes raerie jïengem tsööpkedh?
Årroeh jïjtjemdh, gaavnh aath mïsse dïhte mejnie soptsesth maahta maam joem ektiedidh, jïh doesth ånnetji vuesiehtidh gie datne leah, dellie gåhkese båatah.
Maam 10 jaepine darjoeh?
Dellie mån barkoem åtnam Saepmesne, saemien kultuvren jallh man akt plearoeh sisnjelen. Manne aaj pruvreme mov nïekedsålmine, jïh dagke monnen akte onne fuelhkie.
Maam lih sïjhteme meatan vaeltedh akten aevries såålese, jïh man åvteste?
Ånnetji Emmam heerem jïh aaj jeahtam motovrevïnhtse! Men aaj deerpesnohkigujmie guktie gåarede dehtie aevries sååleste båetedh, guktie im gujht sïjhth aevries såålesne årrodh.
Gie dov saemien åvteguvvie, jïh man åvteste?
Emil Karlsen 100%! Dïhte dan mavvas jïh dan jïjnjem dorje maam jeatjebh eah doesth, joekoen mijjen dajveste, goh saemien nuhtjedh jïh joejkedh. Dïhte manne tjarke skreejrehte jåerhkedh saemiestidh, pryövedh joejkedh jïh våajnoes mearoesaemie årrodh abpe Saepmesne jïh veartenisnie.