Mov nomme Aina Haugom Nordfjell jïh leam 24 jaepien båeries. Manne Røroseste båatam gusnie abpe maana- jïh noereskuvlem veedtsim, jïh aaj jåarhkeskuvlem åvtelen eajhnadovvim maam akt orre pryövedh. Noerhte-Nöörje lij akte laantebielie mïsse lim tjetskehke, jïh lissine lim govleme Romsan lij akte joekoen hijven saemien studeentebyjrese. Romsese juhtedh jïh desnie golme jaepieh årrodh jih bachelorem vaeltedh faagesne Stuvreme, innovasjovne jïh maarhkede, lij dan åvteste akte aelhkie veeljeme.
Manne båatsoefuelhkesne byjjenamme, jïh båatsoe iktesth mov veaksahkommes baante orreme mov saemien identiteetese. Vaerie lea mov hïejme jïh båatsoe lea munnjien aktem perspektijvem jieliedasse vadteme maam im lim sïjhteme åadtjodh jeatjah lehkesne. Røros akte båeries gruvavoene, veaksehks nöörjen kultuvrine, jïh mannasinie manne mov byjjenimmesne leam gellien aejkien jueriedisnie orreme jïjtjene identiteeten bïjre. Daan biejjien maahtam jiehtedh manne akte garmeres saemien gujne aktine juelkine nöörjen kultuvresne jïh aktine juelkine saemien kultuvresne.
Sov identiteetem gaavnedh lea akte fealadimmie orreme maam manne vïenhtem jeenjesh tjïrrehtieh saaht mehtie maadtoste båata, jïh lea naakede man bijre sïjhtem soptsestidh jeatjah noere almetjidie mah dagke seamma dååjrehtimmiem utnieh. Manne sïjhtem vuesiehtidh dam joekoen åajvoeh gellievoetem maam Saepmie maahta faalehtidh, jïh aerpien bïjre soptsestidh maam mijjieh buektiehtamme vaarjelidh dan gellie tjuetie jaepieh. Daah leah mov håhkoeh jïh veanhtadimmieh tsïeglejaapan, jïh manne tjarke aavodem daejnie nïerhkedh!
Njieljie varke gyhtjelassh:
1. Maam 10 jaepine darjoeh?
10 jaepine manne gegkestem manne leam vuajneme jïh dorjeme gellieh dejstie aatijste mej bïjre nïekedem. Mov håhkoe lea hæhtjoem utnedh Sveitsesne, lïereme feelam tjoejehtidh, gaptam gåarodh bielelen viehkiem tjidtjeste utnedh jïh manne leam ræjhkoes.
2. Maam darjoeh jis naaken datnine flöörtede aktene håaloemisnie datne höölth?
Manne mån sïjhtem dam mejjesne vaestiedidh, men im sïjhth bååstede flöörtadidh.
3. Mah tv-raajroeh sïjhth hotellesne vuartasjidh gosse dov lea astoeaejkie skuvlevaaksjomi gaskem?
Maam IM sïjhth vuartasjidh? Manne dan hååkene raajroej mietie goh, men daelie joekoen jïjnjem raajroem RuPaul’s Dragrace vuartesjem. Daate raajroe munnjien raaktan dam veahkam draameste vadta maam aarkebiejjien daarpesjem.
4. Maam saemien åahpetjidie datne buaresjh?
Im daejrieh mejtie maahta naakenem buarasjidh mij ij leah vielie mijjen gaskem, men Elsa Laula Renbergem lyjhkem! Akte gujne heartoeh mïelkesne jïh måara njuenesne.