Gåktu la liehket oahpestiddjen

Jus sidá sjaddat oahpestiddjen 2020/2021 skåvllåjage, de dævdá åhtsåmsjiemáv åvddål biehtsemáno 1. biejve. Válldep aktijvuodav åhttsij ja gåhttjop ságájdahttemij.

Lågå majt Sandra Márjá West subtsas ietjas jage birra oahpestiddjen

Gåktu lij duv jahke oahpestiddjen?
Oahpestiddje-jahke lij suohtas jahke, bessiv Vuonarijka miehtáj manádit ja viehka buoragit oahpásmuvviv muv barggoguojmij. Suohttasamos lij liehket AN:an New Yorkan. Dåppe bessiv ietjá álggoálmmuknuorajt iejvvit ja oahpásmuvvat sijá kultuvrraj, berustimijda ja tjoavddusijda.

Majt dálla dagá?
Dálla bargav Riddu Riđđu festivaloajvven. Lav aj sámediggeájras.

Majt la Oahpestiddje-jahke dunji mierkkim?
Oahppiv ednagav mij la læhkám viehka ávkken munji, aj muv udnásj bargon. Oahppiv ednagav sáme histåvrå ja kultuvra birra, ávttjiv juohkkahattjav låhkåt FORMI-1 váj oadtju buorre vuodomáhtov. Oahppiv åvddånbuktet ja ságastit stuorra juohkusijda. Oahppiv aj ednagav plánima birra, danen gå stuorra oasse Oahpestiddjedåjmas la plánit sihke åvddånbuktemijt ja manojt. Duodden oahppiv ednagav dan birra gåktu sihke sáme ja dáttja sebrudahka doajmmá. Dát jahke lij sivvan gå sebrudagás berustahttjájiv ja gå sihtiv politihkkárin sjaddat.

Sandra Márjá West lij oahpestiddjen skåvllåjage 2012-2013.

Skåvllåjahke sáme oahpestiddjen

Oahpestiddje li oahppe Sámi allaskåvlån/Samisk høgskole Guovddagæjnon. Skåvlån la sierralágásj birás tjiehpes fáhkabarggij ja ressursaj, ja dáppe la sámegiella bæjválasj giella.

Oahpestiddje válldi fágav Sáme kultur- ja sebrudakmáhtto skåvllåjage nalluj, intensijvva kurssa mij vaddá 30 oahppotjuorga. Lågådallamdoajmma vaddá 30 oahppotjuorga duodden, ja navti oadtju ålles oahppojagev.

Gå la oahpestiddje de hæhttu ednagav manádit, sierraláhkáj gidá. Oahpestiddje manni guovtes ja guovtes aktan ja aktan lågådallaba. Hárjjána åvddånbuktemijt dahkat ja ságastit smávep ja stuoráp juohkusijda.

Ruhtadibme

Juolloduvvi niellja stipenda gitta 213 000 kråvnnå 2019/2020 skåvllåjahkáj. Dá oahpestiddjestipenda vatteduvvi sáme nuorajda gudi ietjasa tjadni jahkáj manna sijá barggo la diehtojuohkem. Duodden gåbtjåduvvi gålo manojda ja årromij.

Mij gájbbeduvvá jus galggá oahpestiddjen sjaddat

Vuostatjin hæhttu sihtat ságastit nuoraj lándav miehtáj – ja sijájt åhpadit sáme sebrudagá birra. Dættodip berustimev, aktisasjbarggomielav, subtsastallamtjehpudagáv ja sjuggelisvuodav.

Hæhttu ietjat iellemis vaddet – duosstat subtsastit gåktu dån ietjat sáme duogátjav ja árkkabiejvev váseda, ja dån sjatta viehka vuojnnusin sosiála mediajn.

Dujna bierri åbbålasj oahppomáhtto, i bierri liehket vuorrasabbo gå 25 jage, ja vuogas jus dujna la vuodjemkårttå. Gåhttjop vejulasj åhttsijt ságájdahttemij/auditionij.

Mij de, gå la ållim?

Oahpestiddje oadtju råhtos skåvllåjagev mav e vajálduhte, edna máhtudagáj ja vásádusáj majt ij rat ietjá láhkáj máhte oadtjot. Barggo sjaddá vuogas CV:aj, ja vaddá máhtudagáv masi boahtte barggovadde lijkkuji.

Duodden iesj diedá dån la dahkam viehka buorre bargov sámij birra subtsastit viehka moadda nuorajda, mij vas binnet åvddågáttojt ja givsedimev.

Gehtja manen Vanja sidáj sjaddaj Sáme oahpestiddjen

Vanja Tørresdal (21) Brekkenis Trøndelagan lij Sáme oahpestiddje skåvllåjagen 2018/2019.

Lågå ienebut Vanja birra dáppe.


Vanja Tørresdal (21) Brekkenis Trøndelagan lij Sáme oahpestiddje skåvllåjagen 2018/2019.