Mu namma lea Vibeke Persen ja lean 21 jagi boaris. Mun lean bajásšaddan gilis man namma lea Leaibenjárga, Deanu suohkanis. Munnje lea leamaš hui dehálaš beassat leat meahci ja luonddu lahka, go mun liikon sihke olgun viehkat ja čuoigat. Mu bearrašis mii leat hui lášmadat, nu ahte valáštallan lea álo leamaš guovddážis mu árgabeaivvis.

Mun lean beassan vázzit sihke davvisámegielat mánáidgárddi ja –vuođđoskuvlla Deanušalddis, gos mus lei sámegiella vuosttašgiellan. Joatkkaskuvlla čađahin Lillehammeris Norgga váldovaláštallanjoatkkaskuvllas/ Norges Toppiddrettsgymnasas, čuoigansuorggis. Maŋŋel dan čađahin pedagogihka jahkeovttadaga Innlandet allaskuvllas. Maŋŋel njealje gelddolaš jagi eará kultuvrras, dovden ahte váillahin sámi kultuvrra ja ruovttubáikki. Mun ožžon barggu fágaoahpaheaddjin Deanus vuođđoskuvllas, ja ohppen hui olu dan barggus!

Mun lean sihke rámis ja dovddan vuollegašvuođa go beasan leat ofelaš. Mun illudan oahpahit earáide sámi kultuvrra birra, maid kultuvra mielddisbuktá ja deaivat olu ođđa olbmuid. Mus leat alla vuordámušat dán jahkái, ja jáhkán mun beasan oahppat olu, hástalit iežan ja suohtastallat!

Moadde jođánis gažaldaga

Masa illudat buot eanemusat ofelašjagis?
Mun illudan vástidit gažaldagaide ja humadit olbmuiguin. Jeara fal visot maid imaštalat, ja mun vástidan nu bures go sáhtán. Eai gávdno jallas gažaldagat!

Mii du mielas lea dat deháleamos maid Norgga nuorat galggaše diehtit sámiid birra?
Lea váttis dušše ovtta ášši válljet, go lea nu olu maid nuorat Norggas galggaše diehtit. Jáhkán lea dehálaš ahte dihtet ahte mii maid leat dábálaš nuorat mat dávjá liikot juste seamma áššiide go dáža nuorat, nu go TV-ráidduid geahččat, valáštallat ja olbmáid fárus leat.

Buoremus “icebreaker”?
Mun geahččalivččen humora geavahit. Mun muitalivččen juoidá suohttasa iežan birra, iešironiijain. Ságastallan vuolgá dalle njuovžilit ja ii leat nu dehálaš boagustit go mu vai boagustit go muinna fárrolagaid. Sii boagustit goit juobe!

Maid leat don bargame 10 jagi geahčen?
Mun lean hirbmat spontána ja plánen dávjá dušše ovtta jahkeáigodaga hávális, nu ahte dan gal illudan ieš ge oaidnit. Mun jáhkán ahte lean gárven oahpu, doaivumis oahpaheaddjeoahpu. Muđui lean sihkkarit sajáiduvvon Finnmárkui, báikái gos ii leat guhkki meahccái.

Guđe sámi beakkálmassii lea dus crusha?
Mun anán árvvus sin geat barget garrasit čalmmustahttin dihte sámevuođa. Lea hui buorre leaš dál musihka, logaldallamiid dahje dáidaga bokte, ja mun rámidan sin barggu.

Mun anán árvvus sin geat barget garrasit čalmmustahttin dihte sámevuođa. Lea hui buorre leaš dál musihka, logaldallamiid dahje dáidaga bokte, ja mun rámidan sin barggu.

Buoremus TV-ráidu?
Mun geahčan vaikko maid, dokumentárafilmmaid rájes reality-ráidduide. Lean liikostan Tollerne ja Blålys ráidduide TV2:žis, muhto Friends:a gal sáhtán vaikko man máŋgii geahččat.

Gii lea du sámi idola ja manne?
Go mu olbmát leat hástán mu mielde sámi festiválaide ja vuodjinmátkkiide, de lean liikostan buot sámi musihkkii. Mun liikon artisttaide mat jurddašit veahá ođđa vugiin ja ráhkadit buori musihka sámegillii, go de oahpan ođđa sániid ja dadjanvugiid. Ailu Valle, Isák, Felgen Orkester ja SlinCraze leat muhtimat.