Mu namma lea Vanja Tørresdal, ja mun lean 20-jagi boaris. Lean eret ovtta unna gilážis man namma lea Prahke, Trøndelágas Ruoŧaráji lahka. Doppe vázzen sihke mánáid- ja nuoraidskuvlla, muhto nuoraidskuvlla maŋemus jagi ja oahppospesialiserema joatkkaskuvllas vázzen Plassjes. Golbma jagi reálafága čiekŋudeami maŋŋel šattai miella bargat juoidá áibbas eará ja guorahallat eará vejolašvuođaid.

Mun lean bajásšaddan boazodoallobearrašis gos mii eallit luonddu lahka ja dainna maid luondu midjiide fállá. Dainna duogážin lea munnje álo leamašan dehálaš gaskkustit min kultuvrra viidáseappot earáide. Dan dihte šattai maid miella ohcat sámi ofelažžan, go de mus lea vejolašvuohta oahppat eambbo sámi kultuvrra birra, muhto maid oahpahit earáide.

Astoáiggis liikon leat olgun luonddus, duddjot ja musihkain bargat go mun earret eará lávllun ja čuojahan piáno.

Mus leat olu vuordámušat ofelaš-jahkái. Earret eará illudan oahppat ja earáide oahpahit sámi kultuvrra birra. Dasa lassin illudan mátkkoštit, ja vásihit Norgga olu báikkiid. Illudalan maid hui olu oahpásnuvvat ođđa olbmuide.

Njeallje gažaldaga johtilit:

1. Maid don barggat 10 jagi geahčen?

Mun lean sávvamis váldán oahpu ja lean ožžon barggu mas duođas beroštan, ja soaittán maid álgán ásahit bearraša. Lean maid dahkan diŋggaid maid in lean goassege jáhkkit ahte boađán dahkat. Sávan ahte lean beassan mátkkoštit máilmmis.

2. Maid dagat jus muhtin álgá flirtet duinna go leat doallame logaldallama?

Vuolgá das makkár mielladilli lanjas lea. Soaittán flirtet veaháš ruovttoluotta.

3. Makkár tv-ráidduid boađát geahččat hoteallas astoáiggis skuvlagálledemiid gaskkas?

Once Upon a Time, Orange is the new black, ja soaittán álgit geahččat Game Of Thrones.

4. Makkár sámi beakkálmassii lea dus crush?

Mus ii leat erenoamáš crush gal oktiige, muhto mu mielas lea olu čeahpes artisttat, nugo Sofia Jannok, Felgen Orkester ja ISÁK.