Mun lean Ole-Christer Hætta, lean 19 jagi ja Guovdageainnus eret. Mun orron Guovdageainnus dassá ledjen 3 jagi ja fárrejin bearrašin Áltái. Doppe ledjen sámi mánáidgárddis, ja vázzen sámi luohkás 1. gitta 4. luohkkái. Go leimmet 7 jagi orron Álttás, fárriimet fas Guovdageidnui. Lean sámegiela hupman ruovttus bearrašin, nu ahte lei buorre boahtit ruovttoluotta sámi servodahkii. Mun gergen vuođđoskuvllain ja álgen Sámi joatkkaskuvlii ja boazdoalloskuvlii. Doppe vázzen oahppospesialiserema, ja čiekŋudin e-sportii. 

Mun válden realfágaid vai beasan iežan stuorámus niegu ollášuhttit: pilohtan šaddat. Lean álo liikon girdit. Lean gullan váhnemiin ja mánáidgárdebargiin ahte lean háliidan pilohtan šaddat dan rájes go hupmat álgen. Girdinberoštupmi lea maiddái dolvon mu miehtá máilmmi. Lean jo fitnán máŋgga kontineanttain, ja háliidan fitnat buot kontineanttain. 

Mus lea maid stuora beroštupmii musihkkii, ja erenomážit ealli musihkkii. Oaidnit máilmmi stuorámus nástiid lávlume sin beakkán lávlagiid lea dovdu man haga in birge. Mus lea leamaš nu lihkku go lean beassan vásihit Ariana Grande ja Dua Lipa máŋgii jo. Soai leaba mu jiellat artisttat, ja máhttiba lávddi nalde. Musihkkaberoštupmii lea maid dolvon mu festiválaide miehtá Norgga, mii lea hui somá. 

Moadde jođánis gažaldaga

Masa illudat buot eanemusat ofelašjagis?
Mátkkoštit Norggas, deaivvadit ođđa olbmuiguin ja muitalit sámi kultuvrra birra. 

Mii du mielas lea dat deháleamos maid Norgga nuorat galggaše diehtit sámiid birra?
Ahte mii eat oro lávuin, buot sápmelaččat eai leat ovttaláganat, vaikko olu lea ovtta suli. Ahte buot sámiin eai leat bohccot. 

Buoremus “icebreaker”?
Garvve heahpadit jaskatvuođa, ja álggat ságastallama. 

Maid leat don bargame 10 jagi geahčen?
Logi jagi geahčen lean SAS dahje Widerøe pilohta. 

Maid válddášit mielde ávdin sullui, ja manne?
Helikoptera, vai beasan vuolgit go háliidan. 

Gii lea du sámi idola ja manne?
Mu ristoabbá Ella Marie Hætta Isaksen. Son lea munnje ja oallugiidda stuora ovdagovva. Son duostá bargat dan ovdii maid háliida ja dadjat maid oaivvilda. Dasá lea mus hui stuora respeakta. Ja son lea hui čeahppi lávlut ja juoigat.