Mun lean Nathaniel Holan Larsen, lean 20 jahkasaš márkosápmelaš Áravuomis eret, Áhkanjárgga suohkanis. Lean sápmelaš mas lea dárogiella ruovttugiellan dáruiduhttima geažil. Danne lean studeren sámegiela UiT bokte, ja váldán giela ruovttoluotta. Lean nuoramus sihke suohkanstivrras ja bearrašis. Mus lea maiddái gullevašvuohta Trøndelágii, go áhčči lea doppe eret.

Oallugat dihtet ahte áŋgiruššan politihkkalaččat. Muhto mun maiddái hirbmosit liikon Escape room. Mun ja mu olbmát nagodeimmet beassat olggos Romssa váddáseamos Escape room lanjas geažuhemiid, veahki ja čuovgga haga. Mii vajálduhtiimet cáhkkehit čuovgga. Dat lea dat stuorimus dáhpáhus mu eallimis, maŋŋel dan go válljejuvvojin ofelažžan. Muđui liikon lohkat tragikomiska girjjiid ja spillet PS4:iin.

Lea stuora gudni beassat leat sámi ofelaš. Mun illudan mátkkoštit ja deaivvadit nuoraiguin geat háliidit oahppat sámiid birra. Illudan maiddái ieš oahppat eambbo mu sámi duogáža ja historjjá birra. Mun jáhkán šaddat hirbmat gelddolaš jahkin!

Masa illudat buot eanemusat ofelašjagis? 
Illudan buot eanemusat oažžut SAS Eurobonus Gollekoartta! Ieš mun dájun. Mun illudan deaivat nuoraid geat háliidit oahppat sámiid birra, ja vástidit sin gažaldagaid.

Mii du mielas lea dat deháleamos maid Norgga nuorat galggaše diehtit sámiid birra?
Dat ahte sámit leat dábálaš olbmot muhto maiddái hui girjái ja máŋggaláganat. Mii leat álgoálbmogat, mii oallugiid mielas sáhttá leat veahá imašlaš. Muhto mii leat dábálaš olbmot, mat orrut gávpogiin ja giliin iežamet iPhonaiguin.  

Buoremus “icebreaker”?
Oastte dakkára mii cuvke jieŋa. hehe. Duođas, lea dušše dadjálit hei, jearrat gažaldagaid nuppi birra. Olbmot liikojit iežaset birra hupmat, muitte dan.  

Maid leat don bargame 10 jagi geahčen?
Logi jagi geahčen lean sávvamis geargan sivilekonoma oahpuin ja lea buorre bargu Áhkanjárggas. Lea viessu ja bussá, ja ovttasássi.  

Maid válddášit mielde ávdin sullui, ja manne?

Livččen váldán litna seaŋgga mielde. Livččen goitge guhká ferten vuordit veahki, manne ii de oađđit njálgát dan botta?

Gii lea du sámi idola, ja manne?
Mu sámi idola lea mu eadni. Son lea mu inspireren, ja stuora oasi mu beroštumis vuoiggalašvuhtii ja dásseárvui lean ožžon eatnis.