Mu namma lea Mathis Eira. Mun lean 20 jagi ja lean bajásšaddan Guovdageainnus ja Návuonas. Mu geasseorohat lea Návuonas ja dálveorohat lea Áidejávrris, Guovdageainnu oarjjabealde. Mun lean vázzán Sámi joatkkaskuvlla ja boazodoalloskuvlla, boazodoallooahpu, ja dasto vel lassiaoahpu vai oláhin obbalaš oahppogelbbolašvuođa.

Mun lean bajásšaddan boazodoalus ja barggán beaivvalaččat bohccuiguin. Mun beroštan luođis ja sámi muitalanárbevieruin, ja liikon juoigat ja čállit divttaid ja dajáhusaid. Mun liikon maiddái leat olbmáid fárus, leat olgun ja ealoluhtte leat. 

Munnje lea dehálaš muitalit sámi árbedieđu ja árbevirolaš sámi kultuvrra birra, ja makkár doaibma juohke diŋggas lea, ja lea leamaš, sámi servodagas. Ovdamearkka dihte movt min muitalusárbevierut ledje dehálaččat mánáid bajásgeassimis. 

Mun jáhkán ofelašjahki šaddá hui erenomás. Mun jáhkán oahppat olu, maiddái iežan birra. Dasa lassin šaddá somá mátkkoštit ja humadit eará nuoraiguin, ja muitalit min fiinna kultuvrra ja árbevieruid birra. 

Moadde jođánis gažaldaga

Masa illudat buot eanemusat ofelašjagis?
Illudan buot eanemusat oaidnit movt norgga nuorat váldet vuostá sámi kultuvrra ja movt sin mielas dat orro. Illudan maiddái čájehit movt sápmelaččat eallit ja makkár sámi kultuvra lea ja movt juohke diŋggas lea dihto doaibma.  

Buoremus “icebreaker”?
Juoiggastit.

Maid leat don bargame 10 jagi geahčen?
Jáhkán barggan boazodoalus ja soaittán maiddái kulturgaskkustemiin bargame. 

Maid válddášit mielde ávdin sullui, ja manne?
Niibeboahkána, go dat galgá álo miede go meahcis vánddarda.

Gii lea du sámi idola ja manne?
Sámi idola? Hmm, dat ferte leat Áillohaš (Nils Aslak Valkeapää). Su jurddašanvuohki ja eallinvuohki lea hui ereonomáš ja son lea leamaš stuora oassin juoiganárbevieru ealáskahttimis. Okta liigediehtu: Áillohaš jámii sullii dalle go mun riegádin jagis 2001.