Mu namma lea Maila Risten Bongo Dikkanen ja lean 19 jagi. Lean bajásšaddan Unjárggas, gos čađahin vuođđoskuvlla. Maŋŋel joatkkaskuvlla, man vázzen Čáhcesullos, fárrejin Guovdageidnui sámegiela jahkeohppui Sámi allaskuvllas. Mánnán lean čuvvodan áhččán, gii lea guolásteaddji ja sávzaboanda. Mus lea maid eatni soga bokte gullevašvuohta Guovdageidnui ja boazodollui doppe, mas miessemearkun geasset ja njuovadeapmi čakčat leat hávskimus dáhpáhusat.

Nuoraidskuvlla rájes lean bargan giellabargin Isak Saba Guovddážis Unjárggas. Dan rájes lean dovdan ovddasvástádusa movttiidahttit iežan guovllu mánáid ja nuoraid bisuhit ja nannet sámi kultuvrra, giela ja identitehta. Dat lea danne go ieš lean vásihan man rašši sámegiella ja sámi kultuvra leat mearrasámi guovlluin.

Maŋemus jagi lean maid bargan turistaofelažžan Sokki Adventure turistafitnodagas Guovdageainnus. Doppe lean beassan oahppat man hávski ja deaŧalaš lea muitalit min kultuvrra, árbevieruid, historjjá ja árbedieđuid birra maid mii leat čohkken sihke mearra- ja boazosámi eallimis! Dat lea mu movttiidahttán ohcat ofelašdoibmii. Mun illudan vásihit ofelašjagi ovttas fiinna olbmáiguin, vásihit ođđa báikkiid, hástalit iežan, háhkat ođđa muittuid ja ovddidit iežan váibmoáššiid.

Njeallje gažaldaga johtilit:

1. Maid barggat 10 jagi geahčen?

Hmm, buorre gažaldat. Gii diehtá maid ihttáš beaivi buktá. Mun dieđusge sávan ahte lean háhkan oahpu ja barggan barggu mii addá munnje ilu! Soaittán šaddan sámi oahpaheaddji, álggahan turistadoaimma dahje lean meara alde iežan bivdofatnasiin.

2. Maid dagat jus muhtin flirte duinna go leat logaldallame?

Livččen mojohallan ja flirtestan ruovttoluotta.

3. Guđiid tv-ráidduid áiggut geahččat hoteallain go lea friddja skuvlagalledemiid gaskkas?

Ráiddut ja filmmat eai leat mu stuorámus beroštupmi. Hárve válddán dasa asttu, muhto dáiddán dán jagi beassat daid nai vásihit! Go juo vuos galggan ráidduid geahččat, de gal ferte leat juoga mas lea olu drámá ja veahá rihkkosat, ja mii lea de buoret go klassihkkár Home And Away.

4. Guđe sámi beakkálmassii lea dus crusha?

Ii mus gal leat makkárge sámi beakkálmas-crush, muhto Sámis leat olu buorit ovdagovat! Earret eará dáiddár Máret Ánne Sara gii lea gievrras sámi jietna boazodoalu politihkalaš áššiin. Dasa lassin Nils Rune Utsi, beakkán Slincrase, gii iežas musihka bokte váldá ovdan olu váttis áššiid!