Mu namma lea Linnéa Ellen Knutsen. Mun lean 20 jagi ja lean Ájluovttas Divttasvuonas eret,Hábmera suohkanis. Mu váhnemat leaba goappešagat Divttasvuonas eret, muhto eatni bealde leat mus maiddái máttut Váhčiris, ruoŧa bealde. Mun bajásšadden sihke sámegielain ja dárogielain, ja skuvllas lei mus julevsámegiella vuosttašgiellan gitta joatkkaskuvlii álgen. Joatkkaskuvllas vázzen álggos dearvvašvuođaoahpu, muhto áigon studeret viidáseappot, nu ahte válden lassioahpu vai oláhin obbalaš oahppogelbbolašvuođa. 

Mun lean bajásšaddan Ájluovttas, mii lea unna giláš gaskal Bådåddjo ja Áhkánjárgga gos sullii bealli álbmogis leat julevsápmelaččat. Doppe ii leat nu olu maid fuobmát, nu ahte áigi gollá vuojašit biillain ja leat olbmáid fárus. Mu mielas lea giella hui miellagiddevaš ja jus sáhtálin, de ledjen áigut oahppat buot gielaid. Deháleamos giella munnje lea julevsámegiella. Mus lea miella bargat Julevsámegielain ja oahppat dan buorebut. Danne áiggošin bargat ásahit eambbo julevsámegielat oahpponeavvuid, erenomážit vuođđoskuvlla dássái, ja/dahje šaddat sámegieloahpaheaddjin. 

Moadde jođánis gažaldaga

Masa illudat buot eanemusat ofelašjagis?
Illudan oaidnit Norgga, ja vásihit “orrut koffáris”. 

Mii du mielas lea dat deháleamos maid Norgga nuorat galggaše diehtit sámiid birra?
Ahte sámi guovllut eai leat nu ovttaláganat go oallugat doivot, ja ahte eai buohkat leat boazodoalus.

Buoremus “icebreaker”?
Jearrat maid studerejit dahje barget doaibmá measta juohke háve. 

Maid leat don bargame 10 jagi geahčen?
Mun jáhkán ahte barggan ja orun Ájluovttas, muhto sávvamis lean beassan mátkkoštit máilmmis álggos. 

Maid válddášit mielde ávdin sullui, ja manne?
Dat fertešii leat beaivevuoiddas, go mun buolán nu jođánit. 

Gii lea du sámi idola ja manne?
Mu sámi idola lea mu máttaráhkku, go son lei dat siivomus ja buoremus gii gávdnui. Ii ovttasge earás leat lieggasit váibmu go sus.