Mu namma lea Lemet Johanas Nystad ja lean 21 jagi. Lean bajásšaddan Kárášjogas, muhto vázzen Lillehammeris Norgga váldovaláštallanjoatkkaskuvlla/ Norges toppidrettsgymnasa mas sabetnjuiken lei guovddážis. Lean maid Romssas orron gos studerejin fysioterapiija, muhto válddán dál bottoža oahpus.
Astoáiggis láven oaggut ja lean olu meahcis. Muđui lean hirbmat sosiála ja láven olu olbmáiguin leat fárrolaga. Dasa lassin liikon maiddái hárjehallat.
Go ledjen Lillehammeris de ožžon olu gažaldagaid sápmelaččaid birra ja mun dovden ahte in máhttán doarvái vai sáhtten muitalit min birra. Danne šattai miella oahppat eambbo sámi kultuvrra birra ja vel beassat mátkkoštit Norggas ja muitalit eará nuoraide sápmelaččaid birra.
Mun sávan dán jagi oahppat eambbo kultuvrra birra masa lean nu buorre. Seammás sávan ahte oaččun eambbo olbmáid miehtá Norgga.
Moadde jođánis gažaldaga
Mii du mielas lea dat deháleamos maid Norgga nuorat galggaše diehtit sámiid birra?
Mu mielas lea dehálaš čájehit Norgga nuoraide ahte sápmelaččat eai leat nu earáláganat go eará norgalaččat. Mis lea dieđusge iežamet kultuvra, giella ja árbevierut, muhto leat muđui hui ovttaláganat.
Buoremus “icebreaker”?
Mu buoremus cavgileapmi lea leahkit don ieš, 100%. Ale bala váldimis oktavuođa earáiguin, ale ge jierásnuva go humadat singuin.
Maid leat don bargame 10 jagi geahčen?
Dan lea váttis dadjat, muhto sávvamis lean fárren ruoktot Kárášjohkii ja mus lea bearaš. Muđui sávan ahte lean álggahan iežan fysioterapiijaklinihka.
Buoremus TV-ráidu?
Mun geahčan feara maid, muhto juste dál lea mu jiellat TV-ráidu Hvite gutter. Lea humoristtalaš ráidu mas láven olu boagustit.
Gii lea du sámi idola ja manne?
Mu sámi idola lea Ronald Pulk. Son lea somás olmmái gii lea lihkostuvvan bures Norggas.
Guđe sámi beakkálmassii lea dus crusha?
Diet lei váttis. Ii leat juste crusha ovttage beakkálmassii, muhto jus ferten vástidit de lea várra Agnete Johnsen. Son lea čáppa nieida ja lea dasa lassin čeahppi lávlut.
Masa illudat buot eanemusat ofelašjagis?
Dat masa illudan buot eanemusat lea mátkkoštit Norggas ja deaivat olu ođđa olbmuid. Lea somá oažžut vejolašvuođa mátkkoštit ja muitalit iežan kultuvrra birra.