Bures! Mu namma lea Jovnna Erke Varsi Solbakk, lean 23 jahkásaš ja lean bajásšaddan Hilláguras, mii gullá Deanu gildii, Finnmárkkus. Hillágurra lea unna giláš, moadde miilla Deanu šalddis eret. Mus lea sámegiella eatnigiellan ja lean vázzán sámegielat mánáidgárddis ja sámeskuvlas. Vuođđoskuvla maŋŋá mun fárrejin Áltái joatkaskuvla vázzit. Álttás vázzen golbma jagi mediat ja gulahallan-suorggi. Muđui lean dáid maŋimuš jagiid geahččaladdan, johtán ja orron veaháš gos ge. Earet eará lean vázzán jagi álbmotallaskuvla Kråangkes, Voldas lean váldán veahá oahppočuoggáid, ja Båddådjos lean gergen vuosttaš jagi sosionomaoahppu.
Astoáiggis mun liikon geahččaladdat ja fuobmát vuoikko maid. Earret eará buvttadan musihka, govven, redigeren govaid ja videoid. Muđui lean alo liikon ja beroštan gielaide ja suopmaniidda. Jáhkán ofelašjahki šaddá somás eallinmuitun, huššái ja hui miellagiddevaš. Ja doaivumis ieš maid oahppan ollu, ja seammás beasan vel earáide oahpahit!
Moadde jođánis gažaldaga
Masa illudat buot eanemusat ofelašjagis?
Illudan mátkkoštit, oahpásmuvvat ođđa olbmuiguin, ja dasa lassin vel oaidnit mii Norggas gávdno ja oidno. Dieđusge šaddá maid somá ja miellagiddevaš oahppat eambo olles sámi birra!
Mii du mielas lea dat deháleamos maid Norgga nuorat galggaše diehtit sámiid birra?
Sáhtašin hui olu muitalit, muhto dat deháleamos lea ahte sápmi lea hui girjái ja máŋgabealát, ja dan sivas ovdána maiddá sámi kultuvra.
Buoremus “icebreaker”?
Muitalit hui goike (fuones) vitsa! Jus ii doaimmaš, de álo heive hállat suopmaniid birra ja jearahallat sin ruovttubáikki birra!
Maid don leat bargamin 10 jagi geahčen?
Váttes gažaldat! Dan gal duohta in dieđe. Doaivumis lean gergen sosionomaoahpu, ja beasan sámegiela geavahit.
Maid válddašit mielde ávdin sullui, ja manne?
Hmm. Kánske fatnasa dahje niibbi? Buorre jearaldat..
Gii lea du sámi idola ja manne?
Hui máŋggas! Jus ferten namuhastit: Deatnogátte nuorat, Áilu Valle, Mari Boine, Áillohaš, John Savio, Isak Saba, Elsa Laula Renberg ja vel eambo.. Sáhttá lohkat buohkaid geat leat veahketan, čájetan, juohkán ja čalmmustahtán sámevuođa ja kultuvra.