Čuojahanlistu

Mu namma lea Iŋgá Máret Solberg Åhrén ja lean 19 jagi. Lean bajásšaddan Romssas, muhto lean maid orron Guovdageainnus ja muhtin áiggiid internáhtas Snoasas. Dál lean aiddo geargan Kongsbakken joatkkaskuvllas Romssas ja dovden ahte dárbbašan bottoža realfágain ja skuvlabargguin.

 Mun áhčis leat bohccot Ruoŧa bealde Sámis ja danne lean olu leamaš doppe, erenoamážit geasset, goas miessemearkun lea hávskimus dáhpáhus. Mun liikon erenoamáš bures leat luonddus ja meahcis. Eatnasat Romssas, gos lean bajásšaddán, leat dáččat, muhto doppe leat maid sápmelaččat. Mu eallimis leat dáčča ja sámi identitehta giehtalaga. Nu eai soaitte buohkat dovdat, geat bajásšaddet servodagas gos sámivuohta ii leat nu nanus, muhto mun háliidan čájehit ahte sáhttá eallit goappaš bealde.

Go lean bajásšaddan Romssas gos eatnasat leat dáččat, de lean dávjá ferten čilget ja muitalit sámi kultuvrra birra. Sámi kultuvra lea viiddis ja girjái ja leat olu iešguđetlágan bealit ja dan lea mu mielas deaŧalaš fuomášuhttit. Danne lea nu hávski álgit bargui gos beasan muitalit sámi eallima birra. Muđui leat giella ja boazodoallu maid deaŧalaččat munnje.

Mun sávan ahte ofelašjahki šaddá buorre jahki goas beasan Norgga nuoraide oahpahit veahá sámiid birra. Muđui jáhkán ahte maiddái ieš oahpan olu sihke iežan birra ja eará áššiid.

Njeallje gažaldaga johtilit: :

1. Maid barggat 10 jagi geahčen?

Logi jagi geahčen sávan ahte lean beassan vásihit olu suohttasiid ja ahte mus lea bargu masa liikon. Muđui sávan ahte lean šaddan čorgadeabbon ja hárjánan árrat lihkkat. Livččii maid buorre jus livččen šaddan gierdileabbo go duddjon.

2. Maid dagat jus muhtin flirte duinna go leat logaldallame?

Sáhttá várra dáhpáhuvvat ahte dadjalan juoidá, muhto dađi eambbo in jáhke šaddat.

3. Guđiid tv-ráidduid áiggut geahččat hoteallain go lea friddja skuvlagalledemiid gaskkas?

Lean erenoamáš láiki čuovvut ráidduid, erenoamážit jus leat máŋga sesoŋŋa. Mun baicca guldalan olu podkásttaid! Liikon hui bures Synnøve ja Vanessa podkástta ja Friminutt.

4. Guđe sámi beakkálmassii lea dus crusha?

Hmm, diet lei váttis gažaldat, eai ge gávdno nu galle. Muhto mun liikon bures Kitoka teavsttaid ja Maxida Märaka musihka. Muđui dieđusge lea somá juoigat Felgen Orkester musihkkii.