Mu namma lea Ida Emilie Marakatt Lindseth, lean 19 jagi ja lean bajásšaddan Lillestrømmas, Oslo olggobealde. Mun lean dánson dan rájes go ledjen unni, ja lea álo leamaš buolli beroštupmi dasa. Lean bargan garrasit ja gilvvohallan Freestyle ja Disco Dans surggiin elihtadásis Norggas ja olgoriikas, ja liikon aktiivvalaš árgabeaivái.

Mu váhnemat boahtiba goappešagat sámi guovlluin. Eadni lea Gárasavvonis eret ja áhčči ges Kárášjogas, muhto ieš lean bajásšaddan gávpogis. Unnin in leat hupman sámegiela, muhto oahppagohten sámegiela gáiddusoahpu bokte go álgen joatkkaskuvlii. Lassiin dánsumii, áŋgruššan sámi nuoraidorganisašuvnnas Noereh. Dat lea leamaš hui dehálaš munnje mu sámi gullevašvuhtii ja fierpmádahkii stuora gávpogis.

Lea hui somá go beasan leat okta dán jagi ofelaččain. Mun illudan oahppat eambbo iežan kultuvrra birra, ja dieđusge mátkkoštit miehtá Norgga ja juohkit máhtu ja ovddastit Sámi eará olbmuide. Mun sávan oahpásnuvvat eará guovlluide sihke Sámis ja Norggas, ja illudan deaivvadit ođđa olbmuiguin. Mun jáhkán šaddat jahki mas oahpan olu ja mii lea hástaleaddji, muhto maiddái jahki mas oaččun erenomáš vásáhusaid ja hárjáneami.

Moadde jođánis gažaldaga

Masa illudat buot eanemusat ofelašjagis?

Illudan mátkkoštit iešguđet guovlluide ja skuvllaide. Šaddá miellagiddevaš gullat maid oahppit ja earát jearret, ja ahte jerret go gažaldagaid maid šaddá hástaleaddji vástidit.

Mii du mielas lea dat deháleamos maid Norgga nuorat galggaše diehtit sámiid birra?

Dat mii lea buot deháleamos lea ahte besset diehtit ahte mii eat eale nu go min máttarváhnemat dahke 100 jagi áigi. Mii eat oro lávuin ja buohkain eai leat bohccot.

Buoremus “icebreaker”?

Sámis: gávnnat leahppi go fulkkežagat. Muđui: Geahčči leat go dutnos oktasaš olbmát Facebookas ja Instagrammas

Maid leat don bargame 10 jagi geahčen?

Mun sávan ahte logi jagi geahčen lean vásihan eambbo máilmmis, ja ahte barggan internašunála ásahusas mas olu kultvurrat. Livččii hui gelddolaš bargat olgoriikabálvalusas diplomatiijain, dahje álgoálbmothálddašemiin ja rivttiiguin.

Maid válddášit mielde ávdin sullui, ja manne?

Buori peanna ja assás čállingirjji! De sáhtášin čállit girjji maid earát soitet gávdnat ja lohkat.

Gii lea du sámi idola ja manne?

Mu sámi idola lea Agnete Saba. Son lea hirbmat čeahppi lávlut, ja mun ain liikon “Oro jaska beana” lávlaga. Son lea mu ovdagovva dan dihte go lea nu rabas psyhkalaš hástalusaid birra maid lea vásihan iežas karriearas. Mu mielas lea maiddái tøffa go diibmá geavahišgođii iežas sámi goarggu Saba.