Hei! Mu namma lea Håkon Mudenia, lean 23 jahkásaš ja Deanus Finnmárkkus eret. Ruovttus Deanus lean maŋemus jagiid bargan oahpaheaddjin mánáid- ja nuoraidskuvllas. Ovdal go álgen oahpaheaddjin, ledjen leamaš militearas ja jagi lohkan eŋgelasgiela Romssas.
Dán rádjái lean bargan vaikko maid, ovdamearkka dihte luossabivddu ja ealgabivddu, čuoiganbáhčima ja spábbačiekčama. Olles eallima lean eallán máŋggakultuvrralaš servodagas, gos dáru ja sámi servodagat leat eallán fárrolaga. Dát eallinvásáhus, gos máŋga kultuvrra ja iešguđetlágán árvvut ellet seahkálaga, lea juoga man birra doaivvun beassat muitalit ja gaskkustit ohppiide dán skuvlajagi.
Mu vuordámušat ofelašjahkái leat earret eará beassat deaivat ollu ođđa olbmuid geat bohtet miehtá máilmmi. Mun sávan beassat oahppat eambbo iežan kultuvrra birra ja beassat eastadit diehtemeahttunvuođa sámiid birra ja ovdagáttuid sámiid vuostá. Ja mun illudan hirbmosit oaidnit ja vásihit Norgga, ja maiddái New York!
Njeallje gažaldaga johtilit:
1. Maid barggat don 10 jagi geahčen?
Logi jagi geahčen barggan sámegiel- ja eŋgelasgieloahpaheaddjin! Dahje soaittán bargame sámi dáidagiin ja kultuvrrain, go dat leat mu mielas miellagiddevaš ja juoga mainna sáhtášin bargat.
2. Maid dagat jus muhtin flirte duinna go leat logaldallame?
De gal jáhkán ahte šattan rámis, muhto geahččalan liikká dahkaluddat ahte in beroš. Lean eahpesihkar, muhto in sáhte goit ovtta olbmo diktit billistit eará oasseváldiid ovddas.
3. Guđiid tv-ráidduid áiggut geahččat hoteallain go lea friddja skuvlagalledemiid gaskkas?
Mun soaittán geahččat “The Handmaid’s Tale”. Dan lean guhká háliidan geahččat, ja áidna sivva dasa go in leat juo geahččan dan, lea ahte in leat lohkan girjji. Dan lean dál lohkame. Muđui geahčan tv hui unnán, nu ahte mun gal baicca logan girjjiid.
4. Guđe sámi beakkálmassii lea dus crusha?
Maŋŋel go oidnen Áilu Valle Márkomeanuin, lean ožžon albma “mancrush” sutnje. Son ráhkada áibmadasa musihka ja teavsttaid maid dihte beanta šadden assigoavdái!