Mun lean Emma Elliane Oskal Valkeapää. Lean 21 jagi ja lean Guovdageainnus ja Gárasavvonis Ruoŧa beal Sámi eret. Mun vázzen mánáid- ja nuoraidskuvlla Guovdageainnus ja fárrejin Romsii go joatkkaskuvlii ja Media ja gulahallanohppui álgen. Lean bargan olu iešguđetlágan diŋggaid, ja lean maiddái čađahan jahkeovttodaga sámegielas eatnigiellan Romssa universitehtas.
Lean bajásšaddan Guovdageainnus, mii lea unna sámi giláš gos measta buohkat hupmet sámegiela ja gos sámegiella lea lunddolaš oassi árgabeaivvis. Mun bajásšadden sámegielain, kultuvrrain, boazodoaluin, sámi biepmuin, biktasiiguin ja ohppen juoigat mu fulkkiin ja bearrašis. Dan ovddas lean hui giitevaš. Lean maid čállán lávlagiid ja lávlon dan rájes go ledjen 10 jagi boaris, nu ahte musihkka ja luohti lea hui divrras munnje.
Muđui liikon meahcis leat, oaggut, dánsut ja lávlut buori musihkkii, vuoiŋŋastit ja geahččat dokumentáraid dahje TV-ráidduid. Liikon leat kreatiiva ja duddjot, mátkkoštitt, festiválaide mannát ja ovttastallat olbmáiguin. Illudan oahppat eambbo sámi kultuvrra, historjjá ja servodatdili birra. Illudan maiddái mátkkošit miehtá Norgga, fitnat skuvllain ja deaivat ođđa olbmuid. Mun sávan min barggus ofelažžan lea ávki ja dahká máilmmi veahá buorebun.
Masa illudat buot eanemusat ofelašjagis?
Oahppat eambbo sámi kultuvrra, historjjá ja servodaga birra, ja beassat muitalit dan birra buot skuvllain maid galgat galledit dán jagi!
Mii du mielas lea dat deháleamos maid Norgga nuorat galggaše diehtit sámiid birra?
Mii leat álbmot main lea iežamet kultuvra, giella ja árbevierru mii lea ealas ja mii ovdána. Mii seailluhit árbevieruid, muhto eallit maiddái ođđaáigásaš eallinvuogi. Mu mielas de dehálaš heaitit “mii ja sii” jurddašeami, ja baicca oaidnit dan ahte leat ovttaárvvosaččat beroškeahttá geat leat ja gos leat eret. Dávjá mis lea eambbo mii lea oktasaš go maid doaivut 😊
Buoremus “icebreaker”?
Jurddaš ahte ii mihkkege leat heahpat ja muital juoidá suohttasa. Boagus jus dette ge orro heahpat, dat doaibmá juohke háve.
Maid leat don bargame 10 jagi geahčen?
Mun jáhkán ahte logi jagi geahčen jurddašalan ja muittašan mojonjálmmiin man somá ofelašjahki lei! Mun sáván ahte ain boagustan olu ja ahte lea buorre dilli, ja ahte leat buori olbmát ja mávssolaš ja kreatiivvalaš bargu!
Maid válddášit mielde ávdin sullui, ja manne?
Mohtorfatnása … ?
Gii lea du sámi idola ja manne?
Mus leat máŋga. Sámi artisttat, dáiddárat ja aktivistat. Rievtti mielde buohkat mat barget garrasit dan ovdii mas beroštit. Okta nissonolmmoš gean anán árvvus su musihká, čiekŋalis teavsttaid ja su barggu sámi musihká ovddas lea Mari Boine. Son lea movttiidahttán olu nuorra sápmelaččaid.