Mu namma lea Elle Karen Inga Skum ja lean 20-jagi boaris. Mu ruovttubáiki lea Guovdageaidnu, mu váimmubáiki. Eatnigiella lea davvisámegiella, muhto geahččalan oahppat sihke lulli- ja julevsámegiela. Dovddan mus lea lihkku go lean bajásšaddan sámi kultuvrrain ja sámegielain lunddolaš oassin beaivválaš eallimis.

Lean orron measta olles eallima Guovdageainnus, gos lean vázzán oahppospesialiserema Sámi joatkkaskuvllas ja boazodoalloskuvllas. Muhto maŋemus jagi lean studeren sertifiserejuvvon PT:n (persovnnalaš hárjeheaddjin) ja leamašan práksisis Oslos.

Mun beroštan hui olu kultuvrras ja árbevieruin, váras váldit dan čábbodaga mii mis lea. Liikon maid duddjot, hárjehallat, faláštallát ja olgunastit. Ráhkistan leat luonddus.

Dovddan mus lea nu lihkku go lean ožžon dán vejolašvuođa, ja mun duođai illudalan Ofelaš-jahkái. Vaikko lean hui ruovttut, de illudalan mátkkoštit miehtá Norgga. Lean maid hirbmat giitevaš go beasan leat mielde ná dehálaš barggus go maid Sámi ofelaš lea, ja go beasan eará nuoraide oahpahit sámi kultuvrra birra.

Njeallje gažaldaga johtilit:

1. Maid don barggat 10 jagi geahčen?

10 jagi geahčen lean sávvamis gárven oahpu ja beassan mátkkoštit ja vásihit hui olu. Sávan mus lea bargu mas loavttán ja fiinna ásodat/viessu.

2. Maid dagat jus muhtin álgá flirtet duinna go leat doallame logaldallama?

Naa … Dat várra vuolgá mielladilis – jus oahpaheaddjit leat hui duođalaččat ja leat heittot mielas, de in soaitte. Muhto jus lea nuppe ládje, de gal soaittán leaikkastallat ruovttoluotta.

3. Makkár tv-ráidduid boađát geahččat hoteallas astoáiggis skuvlagálledemiid gaskkas?

Home and Away eahpitkeahttá. Oallugiid mielas dieđus albma sáiboopera, muhto lean geahččan dan dan rájes go ledjen 10-jahkásaš. Lean nu darvánan dasa.

4. Makkár sámi beakkálmassii lea dus crush?

Oba sihkkarit AILU VALLE!! Mun nu liikon su vokálii (jitnii), dasa man birra ráppe, ja su lávdeshowa maid geasuha mu. Ja son lea maid oba hámálaš! Son lea dušše «WOW»!