Mu namma lea Eli Karianne Vesterheim Hætta ja lean 20-jagi boaris. Lean bajásšaddan unna báikkážis, 1,5 miilla Guovdageainnu guovddážis eret, Biltaveaiguolbanis. Lean olles eallima orron dan alit viesus mii lea doppe, ja luondu birrasis lea leamašan mu paradiás. Ruoktu lea álo leamašan doppe. Muhto dovddan mus lea vel nubbi ruoktu. Snoalta Skániid suohkanis. Áhku luhtte. Snoalttas lean orron buot gesiid, máŋga juovlaruohta, ja olu eará oktasašluomuid. Dan dihte boahtibehtet oaidnit ahte mun anán sihke Guovdageainnu gávtti ja Ufuohta/Lulli-Romssa gávtti.
Mun čađahin sihke mánáid-, nuoraid- ja joatkkaskuvlla Guovdageainnus. 2017:s čuččodin skuvladuođaštusain gieđas, hui gearggus ođđa vásáhusaide. Romssas bessen vásihit movt fástabargu lea. Mun bargen juohke beaivvi, sullii 11 mánu, priváhta mánáidgárddis lulágeahčen Romssasullo. Lei hui gelddolaš jahki mas ohppen olu!
Dál vurdet ođđa vásáhusat. Niehku maid guhká lean niegadan lea viimmat ollašuvvan, ja viimmat álgá mu Ofelaš-jahki. Anán hui árvvus ja lean vuovdnái go lean ožžon dán vejolašvuođa mátkkoštit ja muitalit iežan kultuvrra birra. Illudalan sakka oaidnit maid jahki fállá, in leat guhkes áigái ná olu illudan masa ge.
Njeallje gažaldaga johtilit:
1. Maid don barggat 10 jagi geahčen?
Wow, lean oba eahpesihkar. Mu boahtteáiggeniegut juste dál leat mátkkoštit nu olu go vejolaš, ja oaidnit nu olu go vejolaš máilmmis. Muđui sávan ahte lean juobe álgán ge muhtin ohppui mas duođas beroštan. Soaittán maid oastán iežan ásodaga dahje viesu. Geahččalan leat spontána, ja dustet áššiid dađistaga nu movt bohtet.
2. Maid dagat jus muhtin álgá flirtet duinna go leat doallame logaldallama?
Dan gal válddán rápmin jus dat geavvá. Jus sus lea erenoamáš šárbma, de gal soaittán mun maid flirtestit ruovttoluotta.
3. Makkár tv-ráidduid boađát geahččat hoteallas astoáiggis skuvlagálledemiid gaskkas?
Liikon hui sakka tv-ráidduide, ja lean geahččan beare máŋga. Juste dál geahčan Breaking Bad vissa viđat geardde. Muđui liikon válljet tv-ráidduid dan mielde makkár mielas lean. Jus lean váibbas, in ge rievtti mielde gille geahččat nu dárkilit, muhto liikká háliidan juoidá atnit alde, de láven geahččat Friends dahje How I Met Your Mother, muhto jus háliidan geahččat juoidá mii lea hui gelddolaš, de geahčan Game of Thrones.
4. Makkár sámi beakkálmassii lea dus crush?
Ferten mieđihit ahte mu mielas leat buot Felgen Orkester-bártnit hui vuohkkasat čalbmái, erenoamážit dat čuvgesvuovttat … Vuorddes, sis gal dáidet buohkain čuvges vuovttas? Muhto mus lea maid stuora crush Isák-joavkku musihkkii, mas mu oambealli Ella lávlu. *Secret advertising*