Mu namma lea Ane Malene Nordeng, ja lean 23 jagi. Mun lean sihke Ivgubađas ja Gáivuonas eret. Mu áhčči lea Olmmáivákkis eret, ja áhkku mu eatni bealde bođii Gáivuonbađas, nu ahte mun dovddán eanemus gullevašvuođa Gáivutnii. Mu áhkku deaivvadii ádjáin Ivgubađas. Soai náitaleigga ja sajáiduvvuiga eanandoaluin dohko gos áddjá lei eret. Danne šattai Ivgubahta mu ruoktu. Mu áhkus eatni bealde, ja ádjás áhči bealde lei sámegiella eatnigiellan, ja bajásšattaiga mearrasámi birrasis. Mus lei hui lagas oktavuohta áhkuin, ja lean sus oahppan olu min kultuvrra birra.
Mun lean studeren jagi musihkkajournalistihka Englánddas, mii lei mu mielas hui gelddolaš. Maŋŋel dan mearridin fárret ruoktot ja oahppagoahtit davvisámegiela ja čiekŋudit iežan kultuvrii. Dán giđa gárvejin bachelorgráda sosiologiijas, mas čállen sámi fáttáid birra. Bachelorčálus lei dat buoremus maid dahken olles studieáiggi. Joatkkaskuvllas vázzen goahkkaoahpu, ja lean veahá bargan goahkkan ruovttusuohkanis.
Mun lean mátkkoštan olles eallima ja fitnán iešguđet riikain gos leat riikkis kultuvrrat. Mun liikon oahppat kultuvrraid birra. Go boađan guovllus mii lea garrasit dáruiduvvon, oaivvilan mun ahte lea dehálaš olbmot ožžot vejolašvuođa oahppat sápmelaččaid ja sámi kultuvrra birra muhtinis gii dan dovdá ja máhttá oahpahit earáide. Mun illudan ofelašjahkái, go beasan vásihit juoidá ođđasa ja oahppat olu, ja lean rámis go lean válljejuvvon sámi ofelažžan.
Moadde jođánis gažaldaga
Masa illudat buot eanemusat ofelašjagis?
Illudan juohke diŋgii! Muhto lean gal maid illudan orrut Guovdageainnus ja vásihit Guovdageainnu báikkálažžan.
Mii du mielas lea dat deháleamos maid Norgga nuorat galggaše diehtit sámiid birra?
Mun háliidan ahte nuorat galget diehtit dan ahte vaikko mis lea eará kulturvra ja eallinvuohki, de leat goitge dego majoritehtaálbmot. Mis lea seamma oahppovuogádat, geavahit dábálaš biktasiid, orrut viesuin ja leat seammaláganat go eará nuorat ge.
Buoremus “icebreaker”?
Leage nu go ieš leat , huma áššiid maid nubbi maid dovdá ja leage smáđáhkes, de ollet guhkás.
Maid leat don bargame 10 jagi geahčen?
Logi jagi geahčen lea sávvamis fásta bargu Sámis, sámi kultuvrra guoskevaš áššiin dahje sullii nu. Lean maiddái náitalan niehkodievdduin, ja munnos soaitá unna bearaš.
Maid válddášit mielde ávdin sullui, ja manne?
Daján nugo Emma, válddášin mohtorfatnása! Válddášin maiddái biepmu vai ceavccán ja beasan eret dan ávdin sullos. In háliidivčče dohko darvánit.
Gii lea du sámi idola ja manne?
Emil Karlsen 100%! Son lea nu čaffat ja bargá dan maid oallugat eai duostta, erenomážit min guovllus. Son geavaha gávtti ja juoigá. Son movttidahttá mu joatkit hupmamis sámegiela, geahččalit juoigat ja čalmmustáhttit mearrasámiid Sámis ja muđui máilmmis.