Mu namma lea Aina Haugom Nordfjell, ja lean 24 år jagi. Mun lean Rørosas/Plassjes eret, gos vázzen mánáid- ja nuoraidskuvlla, ja joatkkaskuvlla – ovdal go mearridin geahččalit juoidá eará. Ledjen veahá sáhkkii Davvi-Norgga hárrái, ja ledjen maid gullan ahte Romssas lea hui buorre sámi studeantabiras. Danne ii lean váttis fárret Romsii golmma jagi Jođiheapmi, innovašuvdna ja márkan bachelorohppui.
Lean bajásšaddan boazosámi bearrašis, ja boazodoallu lea álo leamaš nu nannoseamos báddi iežan sámi identitehtii. Meahcci lea mu ruoktu, ja boazodoallu lea addán munnje eallinperspektiivva man muđui in livčče ožžon. Røros/Plassje lea boares ruvkebáiki gos lea nanu dáččakultuvra, mii lea dahkan ahte mun bajásšattadettiin lean vásihan olu eahpádusa iežan identitehta hárrái. Odne gal sáhtán dadjan ahte lean rámis sámi nisu geas lea nubbi juolgi dáčča kultuvrras, ja nubbi juolgi ges sámi kultuvrras.
Iežas identitehta gávdnan lea leamaš dakkár mátki maid jáhkán oallugiid vásihan, beroškeahttá das makkár duogáš sis lea, ja dat lea juoga maid háliidan ságastallat eará nuoraiguin geat soitet leame seamma mátkki alde. Mun háliidan čájehit dan čáppa girjáivuođa maid Saepmie sisttisdoallá, ja gaskkustit dan árbbi man mii leat nagodan áimmahuššat nu máŋga čuođi jagi. Dat leat mu sávaldagat ja vuordámušat ofelašjahkái, ja mun illudan sakka álgit ofelašdoibmii!
Njeallje gažaldaga johtilit:
1. Maid barggat 10 jagi geahčen?
10 jagi geahčen sávan ahte lean beassan oaidnit olu ja bargat dan maid lean niegadan ja háliidan. Sávan mus lea Sveicca váriin barta, ahte lean oahppan fidjola čuojahit, gávtti goarrut almmá eatni veahki haga ja ahte lean rikkis!
2. Maid dagat jus muhtin flirte duinna go leat logaldallame?
Mun dáiddán gal mojohallat sutnje, muhto in áiggo ruovttoluotta flirtet.
3. Guđiid tv-ráidduid áiggut geahččat hoteallain go lea friddja skuvlagalledemiid gaskkas?
Maid baicca IN áiggo geahččat? Mun lean dievas ráido-junkie, muhto juste dál RuPaul’s Dragrace. Das oaččun dan meari drámá go dárbbašan iežan dábálaš eallimis.
4. Guđe sámi beakkálmassii lea dus crusha?
In dieđe sáhttá go leat crusha dakkárii gii ii leat šat min gaskkas, muhto mun liikon Elsa Laula Renberg! Son lea duostilis ja roastilis nisu.