Mån lav Ole-Christer Hætta, lav 19 jagák ja lav Guovddagæjnos . Årruv Guovddagæjnon dasik 3-jagágijn sjaddiv, ja dan maŋŋela jåhtiv familjajn Áltáj. Dåppe lidjiv sáme mánájgárden, ja vádtsiv sámeklássan 4. klássa rádjáj. Gå lijma 7 jage Áltán årrum, jådijma vas Guovddagæjnnuj. Lav sámástam sijdan familjajn, ja dajna lij buorre boahtet ruopptot sáme sebrudahkaj. Gærggiv vuodoskåvlåjn ja álggiv Sáme joarkkaskåvllåj ja boatsojæládusskåvllåj. Dåppe vádtsiv oahppospesialisierimav realfágaj, ja tjiegŋodiv e-valástallamij (e-sport). Tjadádiv realfágajt vaj besav iehtjam stuoremus niegov ållidit: girddevuoddjen sjaddat. Lav agev lijkkum girddijda ja ilmmemannulahkaj. Lav æjgádijn ja mánájgárddebarggijn gullam jut lav sihtam girddevuoddjen barggat dat rájes gå ságastahttjájiv. Girddemberustibme l aj muv doalvvum væráldav miehtáj. Lav juo guossidam moadda kontinentajt, ja sidáv divna kontinentajt guossidit.

Mujna l aj stuora berustibme musihkkaj, ja sierraláhkáj livemusihkkaj. Vásedit værálda stuoremus nástijt lávllomin sijá mihtos lávllagijt, njuolgga muv tjalmij åvdån, la dåbddo man dagi iv bierggi. Mujna l læhkám nav vuorbbe gå lav bessam vásedit Ariana Grandev ja Dua Lipa moaddi juo. Såj libá artista masi ållu buoremusát lijkkuv, ja libá tjiehpe siena nanna. Musihkkaberustibme la aj muv festiválajda doalvvum Vuonav miehtáj, mij la muv mielas ihkeva suohtas.

Oanegattjat muv birra

Masi ávvudalá ienemusát oahpestiddjejagen?
Manádit Vuonav miehtáj, ådå ulmutjijt iejvvit ja subtsastit sáme kultuvra birra. 

Mij la duv mielas ájnnasamos majt nuora Vuonan bierriji sámij birra máhttet?
Ep åro låvdagådijn, divna sáme ælla sæmmilágátja, vájku miján la avtalágásjvuohta. Ja divna sámijn ælla boahttsu. 

Gåk dahkat gå iehtjádij ságastahttjá?
Garvvi hehpaduhtte sjávodisvuodav, ja álgada ságastallamav. 

Majt dagá 10 jage duogen?
Låge jage birán lav SAS jali Widerøe girddevuoddje. 

Majt lidji válldet fárruj ávdas suolluj, ja manen?
Helikåpptårav, vaj besav vuolgget gå sidáv.

Gut la duv sáme åvddågåvvå ja manen?
Muv ristaoabbá Ella Marie Hætta Isaksen. Sån la munji ja moaddásijda stuora åvddågåvvån. Sån duosstá tjuottjodit ietjas vuojnojt, ja ij balá moalgedimes. Dasi la mujna huj stuora roaddo. Ja sån la duodden huj tjiehppe lávlotjit ja juojgatjit.