Muv namma la Mirja Cicilia Andersson Renander ja mån lav 18 jagák. Boadáv unna sajátjis man namma l Nerskogen, Rennebu suohkanin mij la Trøndelágan. Bállotjiektjam la agev læhkám muv stuorra berustibme, danen vádtsiv valástallamav Oppdal joarkkaskåvlån gånnå bállotjiektjam lij åvdemusán. Riegádam ja bajássjaddam lav ællobargon, danen lav guhkijt váren læhkám gånnå buoremusát soaptsov.

Sáme kultuvrra la agev læhkám ájnas munji. Sijdan dåssju mån ja muv viellja lijma sáme skåvlån, ja sij skåvlån ettjin heva diede sáme ássjij birra. Danen dávk muv ietjálágátjin adnin, gå mujna l ietjá kultuvrra. Danen oahpestiddjen åhtsiv, danen gå sidáv ietjam kultuvra birra subtsastit ja mij lip jur degu ietjá nuora.

Ávvudaláv ednagit dán jahkáj, sávav sjaddá ållo manádibme ja bessap nuorajt iejvvit lándav miehtáj. Sávav aj bierggiv girddet, dálla nav baláv dassta!

Oanegattjat muv birra

Mij la duv mielas ájnnasamos sámij birra majt nuora Vuonarijkan e diede?
Jut sáme kultuvrra la nav vijdes ja moattebelak.

Gåk dahkat gå iehtjádij ságastahttjá?
Humbos láhkáj ulmutjahttet, de la agev juojddá man birra sáhkadit ja massta tjajmmat.

Majt dagá 10 jage duogen?
Sávav vijmak lav gávnnam majt sidáv dahkat ja lav ållim ietjam åhpadusájn.

Favoritt-tv rájddo?
Dat mij la TV:an gå dav tsahkkidav.

Gut la duv sáme åvddågåvvå ja manen?
Muv mielas la Sofia Jannok viek tjiehpes artissta buorre lávllagij, ájnas sisanujn tevstajn.

Guhtimusj sáme kjendisij la dujna crusha?
Ij jur crush, valla muv mielas la Sofia Jannok viek kul.

Masi ienemusát ávvudalá dán oahpestiddjejagen?
Manádit ja iejvvit ietjá nuorajt ja sáme ássjij birra giehttot.