Muv namma l Mathis Eira. Lav 20 jage ja lav Guovddagæjnon ja Návuonan bajássjaddam. Muv giesseårudak la Návuonan ja dálvveårudak la Áidejávren, bájkásj Guovddagæjno alusjbielen, Suomarájá guovlon. Danna mujna li boahttsu. Lav Sáme joarkkaskåvlåv ja boatsojæládusskåvlåv vádtsám. Danna tjadádiv boatsojæládusoahpov ja duodden vil duoddeåhpadusáv låhkiv vaj åbbålasj oahppomáhtudagáv jåksiv.

Lav ællosujtujn bajássjaddam ja bargav bæjválattjat boahttsuj. Berustav juojgas ja sáme subtsastimárbbedábijs, ja lijkkuv juojggat ja tjállet divtajt ja dajahusájt. Lijkkuv aj rádnastallat, liehket ålggon luondon ja ælo lunna liehket.

Munji l ájnas subtsastit sáme árbbediedo ja árbbedábálasj sáme kultuvra birra, ja makkir doajmma juohkka oasen sáme sebrudagán ja kultuvran la, dálásj- ja åvdepájge. Duola degu gåktu lidjin mijá subtsasárbbedábe ájnnasa mánáj bajásgiessemin. 

Jáhkáv oahpestiddjejahke sjaddá huj mielludahtte. Jáhkáv sjattav ålov oahppat, ja aj iehtjam birra. Duodden sjaddá suohtas mannat ságastittjat ietjá nuoraj, ja subtsastit mijá fijna kultuvra ja árbbedábij birra. 

Oanegattjat muv birra

Masi ávvudalá ienemusát oahpestiddjejagen?
Ávvudaláv gájk ienemusát vásedit gåktu Vuona nuora duosstu sáme kultuvrav ja makkir ájádusá siján li mijá birra. Ávvudaláv aj vuosedit gåktu sáme viessu ja makkir sáme kultuvrra la ja gåktu juohkka oasen la visses doajmma. 

Gåk dahkat gå iehtjádij ságastahttjá?
Juojgastit. 

Majt dagá 10 jage duogen?
Jáhkáv bargav boatsojæládusán ja soajtáv aj kultuvrragaskostimijn bargav. 

Majt lidji válldet fárruj ávdas suolluj, ja manen?
Nijbbeavev, gå dat agev galggá fáron gå luondon la vájaldime.

Gut la duv sáme åvddågåvvå ja manen?
Hmm, dat hæhttu liehket Áillohaš (Nils Aslak Valkeapää). Suv ájádallamvuohke ja viessomvuohke mielastuhttá muv, ja sujna la læhkám stuora oasse juojggamárbbedábe ælládahttemin. Duoddediehto: Áillohaš jámij birrusin dalloj gå riegádiv jagen 2001.