Muv namma l Maila Risten Bongo Dikkanen ja mån lav 19 jage vuoras. Bajássjaddam lav Unjárgan, gånnå aj vuodoskåvlåv ållijiv. Maŋŋel gŋ lidjiv joarkkaskåvlåv Tjáhtjesuollun (Vadsø) ållim, de Guovddagæjnnuj jåhtiv sámegielav låhkåt jagev Sáme Allaskåvlån. Muv mánnávuohta la læhkám ietjám áhtje barggobiejvijt tjuovvot, sån la guollár ja båndor. Mån aj Guovddagæjnnuj ja ællobargguj gulluv iedne slevta tjadi, mærkkom giesen ja njuovvam tjavtjam li jage suohttasamos dáhpádusá.

Nuorajskåvlå rájes lav barggam giellabarggen Isak Saba Guovdátjin Unjárgan. Dallutjis lav dåbddåm dárbov ja åvdåsvásstádusáv bájke sáme mánájt ja nuorajt måvtåstuhttet ietjasa sáme kultuvrav, gielav ja identitiehtav bisodit ja nannit. Sierraláhkáj gå iesj lav vásedam makkir várnnahis dilen sámegiella ja kultuvrra la merrasáme guovlojn.

Maŋemus jagev lav aj barggam turisstaoahpestiddjen Sokki Adventure turistcampan Guovddagæjnon. Dåppe lav vuojnnám man ájnas ja hávsske la muv kultuvrav, árbbedábijt, histåvråv ja vásádusájt iehtjádijda gaskostit sihke merra- ja ællosábmen; dat la muv ednagit arvusmahttám oahpestiddjen åhtsåt! Buorijn mielajn vuordáv jagev hávsskes ulmutjij, ådå bájkij, iehtjama hásstalit, ådå mujtojt hábbmit ja muv vájmmoássjijt låggŋit.

Niellja gatjálvisá jåhtelit:

1. Majt 10 jage duogen dagá?

Hmm buorre gatjálvis, guhtimusj diehtá majt ihttásj biejvve buktá. Diedon sávav bessam lav åhpadusáv tjadádit ja bargav juojnak mij munji edna ávov vaddá! Ihkap lav sjaddam sámegielåhpadiddje, turismajn bargav jali nuoren stebmamin ietjam guollárvantsajn.

2. Majt dagá jus nágin dujna madtju lågådaládijn?

Lidjiv dávk måjudallat ja vehi tjajmmat.

3. Makkir tv-rájdojt sjatta gæhttjat hotellan gå dujna l asstoájgge skåvllåguossidimij gaskan?

Rájdo ja filma gal ælla masi ienemusát ájgev gålådav.. vuorjját assten dagáv, valla dá jage dávk sjattasj! Gå esski galgav rájdojt guovllat, de galggá rájddo edna drámájn ja vehi krim, mij la de buorep gå dålusj Home And Away.

4. Guhtimusj sáme kjendisij la dujna crusha?

Ij la gal mujna makkirak sáme kjendis crush, valla Sámen li edna buorre åvddågåvå! Degu dájddár Maret Anne Sara gut la nanos sáme jiedna boatsojsujtto politihkalasj ássjijn. Ja duodden Nils Rune Utsi, jali Slincraze, gut ietjas musihka baktu gássjelis ássjijt låggŋi!