Muv namma l Linnéa Ellen Knutsen. Lav 20 jage ja lav Ájluovtas Divtasvuonas ,Hábmera suohkanin. Muv æjgáda libá goappátja Divtasvuonas , valla iedne bielen li mujna mátto aj Váhtjerin, Svieriga bielen. Bajássjaddiv sihke sámegielajn ja dárogielajn, ja skåvlån lij mujna julevsámegiella vuostasjgiellan gitta joarkkaskåvllåj álggiv. Joarkkaskåvlån låhkiv vuostak varresvuodaoahpov, ja duodden vil duoddeåhpadusáv låhkiv vaj åbbålasj oahppomáhtudagáv jåksiv. De le vejulasjvuohta vijddásappo låhkåt. 

Lav Ájluovtan bajássjaddam, mij la bájkásj Bådådjo ja Áhkánjárga gaskan, gånnå birrusin bielle álmmugis li julevsáme. Dåppe ij la ednak dahkat, dajna ájgge gållå bijlajn vuojatjit ja rádnastallamij. Muv mielas la giella huj miellagiddis ja jus lidjiv máhttet, de lidjiv ájggot divna gielajt oahppat. Ájnnasamos giella munji l julevsámegiella. Mujna l miella barggat Julevsámegielajn ja dav buorebut oahppat. Danen la miella barggat vaj ásaduvvi ienep julevsámegielak oahpponævo, sierraláhkáj vuodoskåvlåoahppijda, ja/jali barggat  sámegielåhpadiddjen.

Oanegattjat muv birra

Masi ávvudalá ienemusát oahpestiddjejagen?
Ávvudaláv vuojnnet ienep Vuonas, ja vásedit gåktu l “årrot kåffåra sinna”. 

Mij la duv mielas ájnnasamos majt nuora Vuonan bierriji sámij birra máhttet?
Jut sáme guovlo ælla nav sæmmilágátja gå moattes doajvvu, ja gájka sáme ælla boatsojæládusán. 

Gåk dahkat gå iehtjádij ságastahttjá?
Doajmmá vargga agev gatjádit majt ulmusj la låhkåmin jali makkir barggo l.

Majt dagá 10 jage duogen?
Jáhkáv bargav ja årov Ájluovtan, valla sávvamis lav bessam mannádit væráldin vuostak.

Majt lidji válldet fárruj ávdas suolluj, ja manen?
Biejvvevuojddasav, danen gå nav jåhtelit buolatjav. 

Gut la duv sáme åvddågåvvå ja manen?
Muv sáme åvddågåvvå la mattaráhkkum, gå sån lij dat sijvomus ja buoremus guhti gávnnuj. Ij avtanik iehtjádin la lieggasap tsåhke gå sujna.