Tjuodjamlissta

Muv namma l Inga Maret Solberg Åhrén ja mån lav 19 jage vuoras. Råmsån lav riegádam ja bajássjaddam, valla lav Guovddagæjnon årrum mánnán ja muhtem gaskajt læhkám internáhtan Snåasan. Dálla lav jur ållim joarkkaskåvlåv Kongsbakkenin Råmsån ja dåbddiv dárbahiv båttåtjav realfágajs ja skåvllåárggabiejves.

Muv áhtjen la ællo svieriga bielen Sámes, ja navti lav dåppe ednagit mannam, sierraláhkáj mærkkomin mij munji la ållu buoremus dáhpádus giesen. Navti soaptsov viehka buoragit luondon ja váren. Råmsån, gånnå mån lav bajássjaddam li dáttja ieneplågon. Muv árggabiejven låhtåduvvi dáttja ja sáme identitiehtta aktij. Soajttá ij la navti gájkajda gudi bajás sjaddi siebrudagán gånnå sáme ælla ieneplågon, valla sidáv vuosedit ajtu máhttá buoragit viessot goappátjij.

Valla gå lav bajássjaddam Råmsån gånnå ienemusá li dáttja de lav álu hæhttum sáme kultuvra birra subtsastit ja dav tjielggit. Sáme kultuvrra la vijdes ja moattebelak ja girjak ja dav la muv mielas ájnas subtsastit. Navti munji viehka buoragit hiehpá bargujn gånnå besav sáme ássjij birra subtsastit. Duodden la giella ja ællobarggo viehka árvogis munji.

Sávav oahpestiddjejahke sjaddá hávsske ja besav Vuonarijka nuorajda subtsastit sámij birra. Ietján åhpatjav dávk aj ienep iehtjama birra ja ietján aj.

Niellja gatjálvisá jåhtelit:

1. Majt 10 jage duogen dagá?

Lågev jage duogen sávav lav vásedam edna suohttasav ja jut mujna la barggo ja árggabiejvve majna soaptsov. Ietján sávav sjaddam lav ienep rádjánis ja oahppam árrat badjánit. Luluj aj vuogas jus lidjiv sjaddat ienep gierddis duodjuhimen.

2. Majt dagá jus nágin dujna madtju lågådaládijn?

Soajttá lidjiv vásstedit kommentárajn, valla iv galla jáhke lij sjaddat juojddá ienep gå dat.

3. Makkir tv-rájdojt sjatta gæhttjat hotellan gå dujna l asstoájgge skåvllåguossidimij gaskan?

Mån lav viehka tjuorbbe rájdojt tjuovvot, sierraláhkáj jus li guhke måttij sesoŋŋaj. Podkastajda gal ednagit gulldalav! Favorihtaj gaskan danna li Synnøve og Vanessas podkast ja Friminutt.

4. Guhtimusj sáme kjendisij la dujna crusha?

Hmm, dat lij vehi gássjel, ælla maj nav ihkeva moadda sijájs. Valla ednagit lijkkuv Kitoka tevstajda ja Maxida Märaka musihkkaj. Duodden la máj diedon suohtas juojggat Felgen Orkesterij.