Muv namma l Ane Malene Nordeng, mån lav 23 jagák ja lav sihke Ivgubadás ja Gáivuonas. Muv áhttje la Olmmaivákkes, muv iedne ieddne bådij Biertaváres, danen ienemusát Gáivuodnaj gulluv, ietjam mielas. Muv iedne ieddne iejvvij muv iedne áhtjev Ivgubadán, válldujga ja årrujga sijddaj gåsstå muv iedne áhttje bådij ja navti sjattaj dat muv sijddabájkken. Iedne ieddne ja áhtje áhttje lijga iednegielak sámegielaga, ja bajássjaddin merrasáme birrasin.  Lidjiv viek lahka muv iedne æddnáj, sujsta lav ednagav oahppam mijá kultuvra ja bargoj birra.

Låhkåm lav musihka journalistihkav avtav jagev Englándan, dat lij muv mielas viek geldulasj. Dán jage maŋŋela válljijiv sijddaj jåhtet danen gå sihtiv nuorttasámev oahppat ienebut tjiegŋodit ietjam kultuvrraj. Gidán (2021) oadtjuv bachelorgrádav sosiologijjan, tjálliv sáme vidjurij birra, ja dat dahkamus lij ållu buoremusáj gaskan majt lav dahkam ålles åhpadusán. Joarkkaskåvlån vádtsiv koahkka- ja dievnastiddjefágav, ja lav vehi dajna barggam ietjam sijddasuohkanin.

Manádam lav iellemájge tjadá, moadda lándajda moatte kultuvraj ja jur ietjá kultuvrajda oahpásmuvvat la juoga masi viek buoragit lijkkuv. Gå boadáv viek dárojduhtedum guovlos, de la muv mielas sierraláhkáj ájnas jut álmmuk miehtáj lánda bessi sámij ja sáme kultuvra birra oahppat soabmásis gudi máhtti dav åhpadit. Viek ávvudaláv sáme oahpestiddje jahkáj gå besav vásedit ja oahppat edna ådå ássjijt, ja munji l stuorra guddnen oahpestiddjen liehket.

Oanegattjat muv birra

Masi ienemusát ávvudalá dán oahpestiddjejagen?

Diedá ávvudaláv juohkka diŋŋgaj, ålles jahkáj! Valla sierraláhkáj ávvudaláv gå besav Guovdageaidnun årrot ja bájkev sisbieles vásedit.

Mij la duv mielas ájnnasamos majt nuora Vuonan bierriji sámij birra máhttet?

Sidáv nuora galggi diehtet vájku mijájn sámijn la ietjálágásj kultuvrra ja iellemvuohke, de lip má duodaj viek ieneplåhkoálmmuga muodugattja. Vádtsep sæmmi skåvlåjt, tjágŋap sæmmi biktasijda, årrop sæmmi gådijn ja lip má nuora sæmmi láhkáj degu då iehtjáda, jus ållu riekta.

Gåk dahkat gå iehtjádij ságastahttjá?

Galga ber liehket nav gåk dån la, ságasta vidjurij birra masi dåt nubbe máhttá ruohkestit, ja duosta vehi ietjastit vaddet, de ålli guhkás.

Majt dagá 10 jage duogen?

Dalloj sávav mujna la fássta barggo Sámen, sáme kultuvran jali dakkár bargon. Válldum lav aj muv niehkoålmmåjn, ja soajttá munnun la unna familjasj.

Gev lidji válldet fárruj ávdas suolluj, ja manen?

Vehi Emmav háddidaláv, ja javlav aj vantsav motåvråjn! Valla aj bierggasa váj bæssá ierit dat ávdas suollus, danen gå iv má sidá ávdas suollun liehket.

Gut la duv sáme åvddågåvvå ja manen?

Emil Karlsen 100%! Sån la nav duosstel ja dahká majt moadda iehtjáda e duosta, sierraláhkáj mijá guovlos, degu sámástit ja juojggat. Sån muv ednagit arvusmahttá joarkket sámástit, gæhttjalit juojggat ja liehket vuojnnusin merrasábmen ietjá sámijda ja væráldij ietján.