Tjuodjamlissta

Muv namma l Aina Haugom Nordfjell, mån lav 24 jage vuoras. Boadáv Plassjes (Røros), gånnå vádtsiv ålles mánáj- ja nuorajskåvlåv, aktan joarkkaskåvlåv, åvddål mierrediv gæhttjalit juojddá ådå. Nuorttalij-Vuodna lij rijkkaoasse man birra sihtiv ienebut diehtet, ja duodden lidjiv gullam Råmsån la viehka buorre sáme studænntabirás. Danen lij álkke Råmssåj jåhtet ja låhkåt gålmmå jage bachelor Jådedibme, innovasjåvnnå ja márnán.

Mån lav bajás sjaddam ællobarggofamiljan, ja ællobarggo la agev læhkám muv nannusamos tjanástahka ietjam sáme identitiehttaj. Várre la muv sijdda ja ællobarggo la munji vaddám perspektijvav iellemij mav ietjám iv lim oadtjot. Plassje la boares gruvvobájkke nanos dáttja kultuvrajn, ja navti lav moaddi ietjam identitiehtav iehpedam. Uddni máhtáv javllat mån lav mihás nissun avta juolgijn látte ja nubbe juolgge sáme kultuvran.

Ietjas identitiehtav gávnnat la læhkám mannulahka majt jahkáv moaddása tjadádi vájku makkir duogátjis la, ja dan birra sidáv ietjá nuorajda mujttalit gudi soajttá sæmmi láhkáj dåbddi. Ájgov vuosedit dav valjes moattebelakvuodav mij la Sámen, ja gaskostit dav árbev mav mij lip nahkam bisodit nav måttijt tjuodijt jagijt. Dá li muv doajvo ja vuorddemusá oahpestiddjejahkáj, ja ávvudaláv ednagit álgget!

Niellja gatjálvisá jåhtelit:

1. Majt 10 jage duogen dagá?

10 jage duogen sávav vuojnnám ja dahkam lav moadda dajs diŋgajs majt niegadav. Sávav mujna la hyhtto Sveitsan, oahppam lav felev tjuojadit, gáptev goarrot váni viehke iednes ja jut lav boandás.

2. Majt dagá jus nágin dujna madtju lågådaládijn?

Måjudaláv dávk, valla iv jáhke ruopptot madtjuhav.

3. Makkir tv-rájdojt sjatta gæhttjat hotellan gå dujna l asstoájgge skåvllåguossidimij gaskan?

Makkirijt IV sjatta gæhttjat? Mån lav ållu seriejunkie, valla jur dálla gehtjadav ålov RuPaul’s Dragrace. Dat munji vaddá jur nav edna drámá mejt árkkabiejven dárbahav.

4. Guhtimusj sáme kjendisij la dujna crusha?

Iv diede jus máhttá liehket crusha náginij gut ij la desti mijáj gaskan, valla månnå ednagit lijkkuv Elsa Laula Renbergaj! Duosstelis ja buosjes nissun lij gal sån.